Search More

poems > Dingal Poems

शमरण करणी शोध , आम्बदान देवल

अर्जी सामर्थ ईशरी ,
विशरी किम वरदाय ।
पात पुकार पधारणी ,
आरत शांभल आय ।
किरपाल दयालु दीन विनती  साय सुधमन  सारिये ।
कर कोड किरत सहाय सेवक भाव पूरण भाविये ।
उर आद  शक्ति  साद शांभल रीत राजस राखणी।
कर कोड किरपा भाव पूरण साद करणी  शारणी (1)
परमं प्रभाती गवाय करणी करूण किरपा सारजो ।
आधार सेवक लाज कारज जहाज जग उबारजो ।
भर भाव पूजा लाव शगती सार सुर घन शाधणी ।
कर कोड किरपा भाव पूरण साद करणी शारणी ।(2)
लाज कारज साद शांभल मूलतान शैखो लाविया ।
ऊण वखत संवली होय शकती आकश पंथ आविया ।
कर दान कन्या मान राखण परमं परचा पावणी ।
कर कोड किरपा भाव पूरण साद करणी शारणी ।(3)
सिंध प्रांते ऊठ भाग चोथै  सहाय पल मा शाविया ।
काठ तणो पग जोड़ आइ लाव घर पर लाविया ।
ऊर अंजस धाई आद भगती पार पारण पारणी ।
कर कोड किरपा भाव पूरण साद करणी शारणी ।(4)
अध बीच तुटी डोर कुए अणदै सतआरत आवणी ।
दंभी रूप धार शगती जोड़ जुगती तो पार  पारणी ।
उदा रणी  सब काज सेवक धर धीर बंधन धारणी ।
कर कोड किरपा भाव पूरण साद करणी शारणी ।(5)
कार लोपी कान कुमती भान भर कर भद भाखियो
चित चोज पूरण कार खींचे  साख राखण सज साखियो ।
हंण हेक हाथल सिंह शगती कटार केहर काटणी ।
कर कोड किरपा भाव पूरण साद करणी शारणी ।(6)
सत सार परचा पार नांही अपार वरदान आपिया ।
सुर काज शारण लाज कारण ध्यान धीरज धारिया ।
शुण पुकार शकती जोड़ जुगती पार पारख पारणी ।
कर कोड किरपा भाव पूरण साद करणी शारणी ।(7)
अपार परचा  आप जननी शरग दैशाण थिर थापियो ।
जम राज जोड़े हाथ करणी  लाय लाखण मन माफियो ।
दोय जोणी दाख करणी वीठू मूषक वर वाचणी ।
कर कोड किरपा भाव पूरण साद करणी शारणी ।(8)
अष्ट सिद्धी नव निधि अजंस आई अरपण आपजो ।
हरो संकट हमेश मेरा सहाय सेवक सुख सांपजो ।
अम्ब अरज पूरण उदार मइया साय सिधि आवणी ।
कर कोड किरपा भाव पूरण साद करणी शारणी ।(9)
नव लाख चरित्र आद अम्बा पहचाण पुजण पारता ।
अविनाश वाशे अक्षय अविचल वाच वाणी वारता ।
आधार नवधा नाथ आइ साख परक्ष्यात शाखणी ।
कर कोड किरपा भाव पूरण साद करणी शारणी ।(10)
करणी होय किरपाल साद सेवक शारणी ।
करणी होय किरपाल सेवक संकट टालणी।
करणी होय किरिपाल सदा विकट डारणी ।
करणी होय किरपाल सदा सुख संचारणी ।

Latest poems